Shaddy Boo azayobora ibirori by’umugoroba wo gusangira wa Diva Awards

Mbabazi Shadia uzwi ku mazina ya Shaddy Boo uheruka kwegukana ikamba ry’umwamikazi w’ubwiza (Queen of Beauty) azayobora ibirori by’abegukanye ibihembo muri Diva Awards igiye kongera guba ku nshuro ya gatatu.

Shaddy Boo wegukanye igihembo muri Diva Awards ni umwe mu batoranyijwe bazaba bayoboye ibirori byiswe “Diva Awards Gala Dinner” biteganyijwe kuzaba taliki ya 29 Kanama 2025, muri Kicukiro ahazwi nka Copenhagen.

Iki gikorwa cyo gusangira kizitabirwa n’abantu bose bitabiriye Diva Awards hamwe n’ikipe isanzwe itegura ibi bihembo ndetse n’ibyamarare bizahabwa ubutumire.

Niyikiza Olivier ukuriye Diva Awards avuga ko ibi yabikoze mu rwego rwo gukomeza guhuriza hamwe abitabiriye ibi bihembo kugira ngo barusheho kumenyana, kungurana ibitekerezo no gukora akazi mu buryo bwa kinyamwuga.

Ati “Impamvu twahisemo gukorana na Shaddy Boo ni uko ari umuntu ukunzwe wanakundishije abantu benshi ibintu by’ubwiza. Twizeye ko azabiyobora neza.”

Diva Awards ni igikorwa ngarukamwaka gihemba abantu bakora ibijyanye n’ubwiza. Kuri ubu kimaze kuba inshuro ebyiri.

Muri uyu mwaka kigiye kubaho ku nshuro ya gatatu aho byavuye ku bakora ibintu by’ubwiza gusa hiyongeramo n’abandi babarizwa mu ruganda rw’umuziki hamwe n’imideli.

Mu myidagaduro hazahembwa ibyiciro icyenda birimo Indirimbo y’umwaka, Uvanga imiziki neza, Producer mwiza, Album y’umwaka, Umuhanzi mwiza (umugore n’umugabo), Umuraperi w’umwaka, Umuhanzi mwiza ukora gakondo, Umuhanzi mwiza ukizamuka ndetse n’ukora video mwiza muri uyu mwaka.

Mu cyiciro cy’imideli hazahembwa ibyiciro bine ari byo: Umunyamideli w’umwaka, Uwahanze neza imideli, Inzu itunganya imideli y’umwaka hamwe n’uwambara neza akaberwa kurusha abandi.