Hashize umwaka habonetse amashusho yatangaje benshi ubwo Brigitte Macron yajwiburaga umugabo we barimo gusohoka mu ndege mu ruzinduko i Hanoï muri Vietnam.
Ubu umunyamakuru Florian Tardif w’ikinyamakuru Paris Match yatangaje mu gitabo yasohoye uyu munsi kitwa «Un couple (presque) parfait» ko Brigitte yari arakajwe n’umugabo we.
Uyu munyamakuru avuga ko Perezida Macron w’imyaka 48 yari amaze amezi menshi afitanye “umubano udasanzwe” n’umukinnyi wa filimi ukomoka muri Iran witwa Golshifteh Farahani.
Ku gitangazamakuru RTL uyu munyamakuru yagize ati: “Ni ibyo nabwiwe kandi nasubiriwemo n’abari hafi yabo”.
Ko ubutumwa bahanahanye “bwageze kure” ku bw’amasoko ye y’amakuru, nko kumubwira ati: “Mbona uri mwiza cyane”.
Uyu munyamakuru avuga ko Brigitte w’imyaka 73 yaba yarabonye ubutumwa Macron yandikiranye n’uwo munyamakuru, bikaba ari yo ntandaro y’umujinya wa Brigitte no kujwibura umugabo we arimo gusohoka mu ndege.
Uyu munsi uruhande rwa Perezida Macron rwahakaniye ikinyamakuru Le Parisien ko ibyabaye hari aho bihuriye n’uriya mukinnyi wa filimi kandi ko Brigitte atajya agenzura telephone y’umugabo we.
Golshifteh Farahani nta cyo aravuga kuri ibi birimo kuvugwa n’ibinyamakuru byo mu Bufaransa.
Golshifteh Farahani azwi muri filimi nka Extraction na Pirates of the Caribbean.
